ദുബായ്: രാജ്യത്തെ കര്ശനമായ ഇസ്ലാമിക സിവില്, ക്രിമിനല് ശിക്ഷാനിയമങ്ങളിലെ സമഗ്രമാറ്റത്തിന് യു.എ.ഇ. പ്രസിഡന്റ് ശൈഖ് ഖലീഫ ബിന് സായിദ് അല് നഹ്യാന് അംഗീകാരം നല്കി. 21 വയസ് പൂര്ത്തിയായവരുടെ മദ്യപാനം, അവിവാഹിതരായ സ്ത്രീയും പുരുഷനും ഒരുമിച്ച് താമസിക്കുന്നത് എന്നിവ കുറ്റകരമല്ലാതാക്കി കൊണ്ടുള്ള സുപ്രധാന മാറ്റങ്ങളാണ് നടപ്പില് വരുത്തുന്നത്.
ലൈംഗിക കേസുകളുമായി ബന്ധപ്പെട്ട നടപടികള്, അനന്തരാവകാശം, വിവാഹം, വിവാഹമോചനം എന്നിവയുമായി ബന്ധപ്പെട്ട നിയമങ്ങളിലും കാര്യമായ മാറ്റങ്ങളുണ്ടാകും. സ്ത്രീകളെ ഉപദ്രവിക്കുന്ന പ്രതി ബന്ധുവായ പുരുഷനാണെങ്കില് കുറഞ്ഞശിക്ഷ നല്കുന്ന രീതിയാണ് നിലവിലുള്ളത്. പുതിയ പരിഷ്കാരം നിലവില് വരുന്നതോടെ ഈ രീതി മാറും. എല്ലാം കുറ്റകൃത്യമായി കണ്ട് ശിക്ഷ നല്കും. സ്ത്രീകള്ക്കെതിരായ കുറ്റകൃത്യങ്ങള്ക്ക് കനത്ത ശിക്ഷ തന്നെ ഏര്പ്പെടുത്തും.
നിലവില് മദ്യപാനത്തിന് വിവിധ എമിറേറ്റുകളില് വ്യത്യസ്ത നിയമങ്ങളാണ് പ്രാബല്യത്തിലുള്ളത്. മദ്യപാനം സ്വകാര്യമായിട്ടോ അല്ലെങ്കില് ലൈസന്സുള്ള ഇടങ്ങളിലോ ആകണം, മദ്യപിക്കുന്ന വ്യക്തിയ്ക്ക് 21 വയസ് കഴിഞ്ഞിരിക്കണം എന്ന നിബന്ധന മാത്രമാണ് ഇനിയുണ്ടാകുക.
മദ്യപിച്ചതിന്റെ പേരില് യു.എ.ഇയില് കേസെടുക്കുന്നത് അപൂര്വമാണ്. എന്നാല് മറ്റൊരു കുറ്റത്തിന് അറസ്റ്റിലാകുകയും അയാള് ലൈസന്സില്ലാതെ മദ്യം കഴിച്ചിട്ടുണ്ടെങ്കില് അതിന്റെ പേരില് കുറ്റം ചുമത്തിയിരുന്നു. ഇതിലാണ് ഇപ്പോള് മാറ്റം വരുത്തുന്നത്.
അതേസമയം പ്രായപൂര്ത്തിയാകാത്ത കുട്ടികള്, മാനസിക വെല്ലുവിളി നേരിടുന്നവര് എന്നിവരെ ബലാത്സംഗത്തിനിരയാക്കുന്നവര്ക്ക് വധശിക്ഷ ഏര്പ്പെടുത്താനും തീരുമാനിച്ചിട്ടുണ്ട്.
അതോടൊപ്പം പ്രവാസികളുമായി ബന്ധപ്പെട്ട വ്യക്തി നിയമങ്ങളില് ഇസ്ലാമിക നിയമങ്ങളുടെ ഉപയോഗം പരിമിതപ്പെടുത്തുന്നതിനും പുതിയ പരിഷ്കാരം ലക്ഷ്യമിടുന്നുണ്ട്. നിലവില് ഇരൂന്നൂറിലധികം രാജ്യങ്ങളില് നിന്നുള്ള പൗരന്മാരാണ് യു.എ.ഇയില് താമസിക്കുന്നത്.
വ്യക്തിഗത സിവില് കോഡില് വരുന്ന മാറ്റങ്ങള് പ്രവാസികള്ക്ക് തര്ക്കങ്ങള് പരിഹരിക്കുന്നതിനും ബഹുസ്വരത പ്രോത്സാഹിപ്പിക്കുന്നതും എളുപ്പമാക്കും. ഭേദഗതികള് യു.എ.ഇ.യിലെ പ്രവാസികള്ക്ക് പിന്തുടര്ച്ചാവകാശവും സ്വത്ത് കൈമാറ്റവുമായി ബന്ധപ്പെട്ട വിഷയങ്ങളില് അവരുടെ സ്വന്തം രാജ്യത്തെ നിയമങ്ങള് പിന്തുടരാം. വില്പ്പത്രമുണ്ടെങ്കില് അതിനനുസരിച്ച് സ്വത്ത് കൈമാറ്റം ചെയ്യാം. എന്നാല്, വിവാഹവുമായി ബന്ധപ്പെട്ട വിഷയങ്ങളില് ഏത് രാജ്യത്താണോ വിവാഹം നടന്നത് ആ രാജ്യത്തെ നിയമമാണ് ബാധകമാവുക.
ഉഭയസമ്മതപ്രകാരം ലൈംഗികബന്ധത്തില് ഏര്പ്പെടുന്നത് ശിക്ഷാര്ഹമല്ല. എന്നാല് പ്രായപൂര്ത്തിയാകാത്ത കുട്ടികള്, മാനസിക വെല്ലുവിളി നേരിടുന്നവര് എന്നിവരുമായുള്ള ലൈംഗികബന്ധത്തിന് വധശിക്ഷ ലഭിക്കും.
മറ്റുള്ളവരെ സഹായിക്കാനായി ചെയ്യുന്ന പ്രവൃത്തികാരണം മറ്റൊരു വ്യക്തിക്ക് എന്തെങ്കിലുംതരത്തില് ബുദ്ധിമുട്ടുകള് ഉണ്ടായാല് ആ വ്യക്തി കുറ്റകൃത്യത്തിന് ഉത്തരവാദിയല്ലെന്നും പുതിയ നിയമത്തില് പറയുന്നു.
