ഇടുക്കിയില് നിന്നും വയനാട്ടിലെ വിവാഹവേദിയിലേക്ക് ഹെലികോപ്റ്ററില് വധുവിന്റെ മാസ് എന്ട്രി
കോവിഡ് കാലത്തു യാത്ര സുരക്ഷിതവും സുഖകരവുമാക്കാന് ഇടുക്കിയില് നിന്നും വധു വയനാട്ടിലെ വിവാഹവേദിയിലേക്ക് ഹെലികോപ്റ്ററില് പറന്നെത്തി. ഇടുക്കി വണ്ടമ്മേട് സ്വദേശി മരിയയാണ് വിവാഹ വേദിയിലേയ്ക്ക് ബോളിവുഡ് സ്റ്റൈലില് എത്തിയത്. വണ്ടന്മേട് ആമയാര് ആക്കാട്ടമുണ്ടയില് ബേബിച്ചന്റെ മകള് മരിയയുടെയും വയനാട് പുല്പ്പള്ളി കാക്കുഴിയില് ടോമിയുടെ മകന് വൈശാഖിന്റെയും വിവാഹമാണ് ഹെലികോപ്ടറിന്റെ സാന്നിധ്യം കൊണ്ട് വ്യത്യസ്തമായത്.
ആമയാര് എം.ഇ.എസ്. സ്കൂള് മൈതാനത്താണ് ഹെലികോപ്ടറില് എത്തിയ വധു ഇറങ്ങിയത്. വണ്ടന്മേട്ടില്നിന്ന് ഒന്നേകാല്മണിക്കൂര്കൊണ്ട് വയനാട്ടിലെ വിവാഹസ്ഥലത്ത് എത്തി. വിവാഹശേഷം ഇതേ ഹെലികോപ്റ്ററില് വധുവും വരനും വൈകീട്ടോടെ വണ്ടന്മേട്ടിലെത്തി. ചെലവ് കൂടുതലായെങ്കിലും യാത്രയ്ക്ക് ചുരുങ്ങിയ സമയമേ വേണ്ടിവന്നുള്ളൂ. വിവാഹദിവസം റോഡ് യാത്ര ഒഴിവാക്കാനുമായി. ഇക്കാരണങ്ങളാലാണ് യാത്ര ഹെലികോപ്റ്ററിലാക്കിയതെന്ന് വധുവിന്റെ വീട്ടുകാര് പറഞ്ഞു.
