മുംബൈ: പോണ് ചിത്രങ്ങള് നിര്മ്മിച്ചതുമായി ബന്ധപ്പെട്ട കേസില് അറസ്റ്റിലായ വ്യവസായിയും ബോളിവുഡ് നടി ശില്പ ഷെട്ടിയുടെ ഭര്ത്താവുമായ രാജ് കുന്ദ്ര കഴിഞ്ഞ ഒന്നരവര്ഷം കൊണ്ട് സമ്പാദിച്ചത് കോടിക്കണക്കിന് രൂപയെന്ന് അന്വേഷണസംഘം.
നൂറിലധികം പോണ് ചിത്രങ്ങളാണ് ഇക്കാലയളവില് കുന്ദ്രയും സംഘവും നിര്മ്മിച്ചത്. അന്വേഷണവുമായി കുന്ദ്ര സഹകരിക്കുന്നില്ലെന്നും മുബൈ പൊലീസ് ക്രൈം ബ്രാഞ്ച് പറഞ്ഞു.
രാജ് കുന്ദ്രയടക്കം 11 പേരെയാണ് മുംബൈ പൊലീസ് കഴിഞ്ഞദിവസം അറസ്റ്റ് ചെയ്തത്. പോണോഗ്രഫി നിര്മ്മാണവുമായി ബന്ധപ്പെട്ട ഗൂഢാലോചനയില് രാജ് കുന്ദ്രയ്ക്ക് പങ്കുണ്ടെന്ന് പൊലീസ് അറിയിച്ചിട്ടുണ്ട്.
രാജ് കുന്ദ്രക്കെതിരെ നിരവധി തെളിവുകള് ലഭിച്ചിട്ടുണ്ടെന്നും എന്നാല് കൂടുതല് അന്വേഷണം നടത്തേണ്ടതുണ്ടെന്നും പൊലീസ് കൂട്ടിച്ചേര്ത്തു. ഫെബ്രുവരിയിലാണ് ഈ കേസ് രജിസ്റ്റര് ചെയ്തത്. പോണ് ചിത്രങ്ങള് നിര്മ്മിച്ച് യുകെ കേന്ദ്രീകരിച്ചു ചില സൈറ്റുകള് വഴി പ്രചരിപ്പിക്കുന്നുവെന്ന് മുംബൈ ക്രൈം ബ്രാഞ്ചിന് ലഭിച്ച പരാതിയെ തുടര്ന്നായിരുന്നു കേസെടുത്തത്.
കേസുമായി തനിക്ക് ബന്ധമില്ലെന്ന് രാജ് കുന്ദ്ര പ്രതികരിച്ചിരുന്നു. കേസില് മുന്കൂര് ജാമ്യത്തിനായി ഹരജി സമര്പ്പിക്കുകയും ചെയ്തിരുന്നു.
ജെ.എല്. സ്ട്രീം എന്ന ആപ്പിന്റെ ഉടമസ്ഥനായ രാജ് കുന്ദ്ര ഐ.പി.എല്. ടീമായ രാജസ്ഥാന് റോയല്സിന്റെ ഉടമകളില് ഒരാള് കൂടിയാണ്.
2019 മുതലാണ് രാജ് കുന്ദ്ര പോണ് ചിത്രനിര്മാണത്തിലേക്ക് തിരിഞ്ഞത്. ഒന്നര വര്ഷം കൊണ്ട് കോടികളാണ് ഈ ബിസിനസിലൂടെ സമ്പാദിച്ചത്.
അന്ധേരിയിലുള്ള രാജ് കുന്ദ്രയുടെ ഓഫീസില് നടത്തിയ പരിശോധനയില് നിന്ന് ഇത് സംബന്ധിക്കുന്ന ഡാറ്റയും കണ്ടെടുത്തു. ടി.ബി (ടെറാബൈറ്റ്) കണക്കിന് ഡാറ്റയാണ് കണ്ടെടുത്തത്.
ഹോട്ട് ഷോട്സ് എന്ന ആപ് വഴിയാണ് രാജ് കുന്ദ്ര തന്റെ പ്രൊഡക്ഷന് ഹൗസ് വഴി നിര്മിച്ച പോണ് ചിത്രങ്ങള് പ്രദര്ശിപ്പിച്ചിരുന്നത്. പണം നല്കി ഈ ആപ്പ് ഉപയോഗിച്ചിരുന്നത് 20 ലക്ഷത്തിന് മുകളില് ആളുകളാണെന്നും അന്വേഷണസംഘം കണ്ടെത്തി. ലോകത്തെ ആദ്യത്തെ 18+ ആപ്ലിക്കേഷനായിരുന്നു ഹോട് ഷോര്ട്സ് എന്നാണ് വിശേഷിപ്പിച്ചിരുന്നത്.
