ടോക്കിയോ പാരാലിമ്പിക്സില് രണ്ട് മെഡലുകള് കൂടി സ്വന്തമാക്കി ഇന്ത്യ. ഇന്ന് നടന്ന മിക്സഡ് 50 മീറ്റര് പിസ്റ്റള് എസ് എച്ച് 1 പുരുഷ വിഭാഗത്തില് ഇന്ത്യയുടെ മനീഷ് നര്വാള് സ്വര്ണവും സിംഗ് രാജ് അദാന വെള്ളിയും സ്വന്തമാക്കി. ഫൈനലില് 218.2 പോയന്റ് നേടി പാരാലിമ്പിക്സ് റെക്കോഡോടെയാണ് മനീഷ് നര്വാള് സ്വര്ണം നേടിയത്. 216.7 പോയന്റ് നേടിക്കൊണ്ട് സിംഗ് രാജ് വെള്ളി മെഡല് നേടി. സിംഗ് രാജിന്റെ ടോക്കിയോ ഒളിമ്പിക്സിലെ രണ്ടാമത്തെ മെഡലാണിത്. റഷ്യയുടെ സെര്ജി മലിഷേവിനാണ് വെങ്കലം.
സ്വര്ണവും വെള്ളിയും നേടിയതോടെ പോയന്റ് പട്ടികയില് ഇന്ത്യ 34-ാം സ്ഥാനത്തേക്ക് ഉയര്ന്നു. മൂന്ന് സ്വര്ണവും ഏഴ് വെള്ളിയും അഞ്ച് വെങ്കലവുമുള്പ്പെടെ പാരാലിമ്പിക്സില് ഇന്ത്യയുടെ മെഡല് നേട്ടം 15 ആയി. 2016ലെ റിയോ ഒളിമ്പിക്സ് ആണ് ഇതിനു മുമ്പത്തെ ഇന്ത്യയുടെ മികച്ച പ്രകടനം.
പുരുഷന്മാരുടെ ബാഡ്മിന്റണ് എസ് എല് 3 വിഭാഗത്തില് ഇന്ത്യയുടെ പ്രമോദ് ഭഗത് ഫൈനലില് പ്രവേശിച്ചതോടെ അതിലും ഇന്ത്യ മെഡല് ഉറപ്പിച്ചു.ജപ്പാന്റെ ദയ്സുകി ഫുജിഹരയെ കീഴടക്കിയാണ് പ്രമോദ് ഫൈനലിലേക്ക് മുന്നേറിയത്. നേരിട്ടുള്ള സെറ്റുകള്ക്കാണ് ഇന്ത്യന് താരത്തിന്റെ വിജയം. സ്കോര്: 21-11, 21-16. ഫൈനലില് ബ്രിട്ടന്റെ ഡാനിയേല് ബെതെല് ആണ് പ്രമോദിന്റെ എതിരാളി.ഈ വിഭാഗത്തില് പ്രമോദാണ് ലോക ഒന്നാം നമ്പര് താരം. ബെതെല് ലോക രണ്ടാം നമ്പര് താരമാണ്. സെമിയില് ഇന്ത്യന് താരം മനോജ് സര്ക്കാരിനെ പരാജയപ്പെടുത്തിയാണ് ബെതെല് ഫൈനലിലേക്ക് കടന്നത്. മനോജ് വെങ്കല മെഡലിനായി മത്സരിക്കും.
