മുംബൈ: ഇന്ത്യയിലെ ആദ്യത്തെ അതീവ വ്യാപന ശേഷിയുള്ള ഒമിക്രോണ് വേരിയന്റിനെ പൂനെയില് കണ്ടെത്തി. പൂനെ സ്വദേശിയുടെ സാമ്പിള് പരിശോധിച്ചതില് നിന്നാണ് ഒമിക്രോണ് സബ് വേരിയന്റായ ബിക്യൂ-1 കണ്ടെത്തിയത്. സംസ്ഥാനത്ത് അണുബാധകള് വര്ധിക്കുന്നതായി മഹാരാഷ്ട്ര ആരോഗ്യവകുപ്പ് കഴിഞ്ഞ ദിവസം മുന്നറിയിപ്പു നല്കിയിരുന്നു. അപകട സാധ്യത ഏറിയ രോഗികള് മുന്കരുതല് കൃത്യമായി പാലിക്കണമെന്ന് ആരോഗ്യ വകുപ്പ് മാര്ഗനിര്ദ്ദേശം നല്കിയിട്ടുണ്ട്. അതീവ വ്യാപന ശേഷിയുള്ളതാണ് പുതിയ വേരിയന്റ്. ബിക്യൂ.1, ബിക്യൂ.1.1 എന്നിവ ഒമിക്രോണിന്റെ വകഭേദങ്ങളാണ്. കോവിഡ് 19 കേസുകളും വര്ധിക്കുന്നുണ്ട്.
മഹാരാഷ്ട്രയില് കോവിഡ് കേസുകളില് കഴിഞ്ഞ ആഴ്ച 17.7 ശതമാനത്തിന്റെ വര്ധനവുണ്ടായിരുന്നു. പൂനെയില് റിപ്പോര്ട്ടുചെയ്തത് 23 കേസുകളാണ് പൊതുസ്ഥലങ്ങളില് കോവിഡ് മാനദണ്ഡങ്ങള് കൃത്യമായി
പാലിക്കേണ്ടതുണ്ട്. പനിപോലുള്ള ലക്ഷണങ്ങള് അവഗണിക്കരുതെന്നും എത്രയും വേഗം വൈദ്യസഹായം നേടണമെന്നും ആരോഗ്യവകുപ്പ് നിര്ദ്ദേശം നല്കി. ഉത്സവ സീസണാണ് വരുന്നത് രോഗം പകരാനുള്ള സാധ്യത കൂടുതലാണ് അതുകൊണ്ടുതന്നെ ആരോഗ്യവകുപ്പ് നല്ക്കുന്ന മാര്ഗ നിര്ദ്ദേശങ്ങളില് വിട്ടുവീഴ്ച്ച കാണിക്കരുതെന്നും കര്ശന നിര്ദ്ദേശമുണ്ട്.
ലോകത്തിന്റെ വിവിധ ഭാഗങ്ങളില് കോവിഡ് പുതിയ ജനിതക വകഭേദം റിപ്പോര്ട്ടു ചെയ്ത സാഹചര്യത്തില് കേരളത്തില് പ്രതിരോധ പ്രവര്ത്തനങ്ങള് ശക്തമാക്കിയതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. എല്ലാ ജില്ലകള്ക്കും ആവശ്യമായ നിര്ദേശങ്ങള് നല്കിയിട്ടുണ്ട്. ഇതുവരെയുള്ള കോവിഡ് വകഭേദങ്ങളില് നിന്നും വളരെ വ്യാപന ശേഷിയുള്ളതാണ് പുതിയ വകഭേദം. അതിനാല്തന്നെ പ്രതിരോധം കൂടുതല് ശക്തിപ്പെടുത്തുന്നതാണ്. രോഗം ബാധിച്ചവരില് 1.8 ശതമാനം പേര്ക്ക് ആശുപത്രി ചികിത്സ ആവശ്യമായി വരാം. നിലവില് ആശങ്കപ്പെടേണ്ട യാതൊരു സാഹചര്യവുമില്ല. എങ്കിലും എല്ലാവരും ശ്രദ്ധിക്കേണ്ടതാണ്. സ്വയം പ്രതിരോധത്തിനായി എല്ലാവരും മാസ്ക് കൃത്യമായി ധരിക്കണം. പ്രായമായവരും അനുബന്ധ രോഗമുള്ളവരും മാസ്ക് നിര്ബന്ധമായും ധരിക്കണം.
എയര്പോര്ട്ടിലും അടച്ചിട്ട സ്ഥലങ്ങളിലും മാസ്ക് ധരിക്കേണ്ടതാണെന്ന് മന്ത്രി അഭ്യര്ത്ഥിച്ചു. ആരോഗ്യ വകുപ്പിന്റെ മുന്കരുതലുകളും ക്രമീകരണങ്ങളും വിലയിരുത്താന് മന്ത്രിയുടെ നേതൃത്വത്തില് ഉന്നതതല യോഗം വിളിച്ചു കൂട്ടി. സംസ്ഥാനത്ത് നിലവില് കോവിഡ് കേസുകള് പൊതുവേ കുറഞ്ഞു വരികയാണെന്ന് യോഗം വിലയിരുത്തി. കോവിഡ് കേസുകള് നിലവില് ആയിരത്തില് താഴെയാണ്. കോവിഡ് ജനിതക വകഭേദം ഉണ്ടായിട്ടുണ്ടോയെന്ന് പരിശോധിക്കാന് സ്ഥിരമായി സാമ്പിളുകള് അയച്ചു വരുന്നു.
പുതിയ സാഹചര്യത്തില് കൂടുതല് സാമ്പിളുകള് ജനിതക വകഭേദത്തിനായി അയയ്ക്കും. ആശുപത്രി അഡ്മിഷന്, കിടക്കകള്, ഐസിയു ഉപയോഗം കൃത്യമായി എന്നിവ നിരീക്ഷിക്കാന് മന്ത്രി നിര്ദേശം നല്കി. ഇന്ഫ്ളുവന്സ കേസുകളും കോവിഡും റിപ്പോര്ട്ടു ചെയ്യുന്ന സാഹചര്യത്തില് ഇന്ഫ്ളുവന്സയ്ക്ക് സമാനമായ രോഗലക്ഷണങ്ങളുമായി വരുന്നവര്ക്കുള്ള മാര്ഗനിര്ദേശങ്ങള് പുറത്തിറക്കുന്നതാണ്. പ്രായമായവര്ക്കും അനുബന്ധ രോഗമുള്ളവര്ക്കും പുതിയ കോവിഡ് വകഭേദം ബാധിച്ചാല് ഗുരുതരമാകാന് സാധ്യതയുണ്ട്. അതിനാല് തന്നെ അവര് കൂടുതല് ശ്രദ്ധിക്കണം. പ്രായമായവരും ആരോഗ്യ പ്രവര്ത്തകരും അനുബന്ധ രോഗമുള്ളവരും നിര്ബന്ധമായും കരുതല് ഡോസ് എടുക്കേണ്ടതാണ്.
