മാഞ്ചസ്റ്ററിന് സമീപം ഓള്ഡ്ഹാമിലെ കെയര് ഹോമിലെ അന്തേവാസിയായ വയോധിക പീഡിപ്പിക്കപ്പെട്ടതായി പരാതി. പുതുവര്ഷ ദിനത്തിന്റെയന്ന് പുലര്ച്ചെയാണ് സംഭവം. ഓള്ഡ്ഹാമിലെ കെയര് ഹോം പരിസരത്ത് അജ്ഞാതനായ ഒരാളുടെ സാന്നിധ്യം തിരിച്ചറിഞ്ഞതിനെ തുടര്ന്ന് ഗ്രേറ്റര് മാഞ്ചസ്റ്റര് പൊലീസിനു വിവരം ലഭിച്ചപ്പോളാണ് സംഭവം പുറത്ത് വന്നത്. ഗുരുതരമായ ലൈംഗിക അതിക്രമത്തിന് വിധേയയായ വയോധികയെ പൊലീസെത്തി ആശുപത്രിയിലേക്ക് മാറ്റി.
സംഭവത്തില് സാഹചര്യ തെളിവുകളുടെ അടിസ്ഥാനത്തില് സ്ഥിരമായി മേല്വിലാസം ഇല്ലാത്ത ജെയ്ക്ക് ആസ്ലി എന്ന് പേരുള്ള 21 വയസുകാരനായ യുവാവിനെ പൊലീസ് കസ്റ്റഡിയില് എടുത്തിട്ടുണ്ട്. വിശദമായ ചോദ്യം ചെയ്യലിനെ തുടര്ന്ന് വിവിധ വകുപ്പുകള് ചുമത്തി കേസ് എടുത്തു.
ബോധപൂര്വം അതിക്രമിച്ച് കയറുക, മനഃപൂര്വ്വമായി ലൈംഗിക കുറ്റകൃത്യം ചെയ്യുക, ആക്രമണം എന്നിങ്ങനെയുള്ള കുറ്റങ്ങള് ചുമത്തിയാണ് കേസ് എടുത്തിട്ടുള്ളത്. പ്രതിയെ ഇന്ന് ടാംസൈഡ് മജിസ്ട്രേറ്റ് കോടതിയില് ഹാജരാക്കും
കെയര് ഹോമിലെ മറ്റ് അന്തേവാസികള് എല്ലാവരും സുരക്ഷിതരാണെന്നും സന്ദര്ശനം താല്ക്കാലികമായി നിര്ത്തി വച്ചിരിക്കുകയാണെന്നു പൊലീസ് പറഞ്ഞു. കേസില് വിശദമായ അന്വേഷണം തുടരുകയാണെന്നും കെയര് ഹോമിലെ അന്തേവാസികളുടെ സുരക്ഷ മുഖ്യമാണെന്നും ഗ്രേറ്റര് മാഞ്ചസ്റ്റര് പൊലീസ് സൂപ്രണ്ട് ഫിലിപ്പ് ഹച്ചിന്സണ് കൂട്ടിച്ചേര്ത്തു.
