പ്രവാസ ജീവിതത്തില് മലയാളികള് എന്നും മുന്നിലാണ്. ലോകത്തിന്റെ ഏതു മൂലയില് ചെന്നാലും ഒരു മലയാളിയുടെ സാന്നിധ്യം നമ്മെ അത്ഭുത പ്പെടുത്തുന്നു. കാലാകാലങ്ങളില് അതിനായി പല രാജ്യങ്ങളും അവര് തെരഞ്ഞെടുക്കുന്നു. ഗള്ഫ് രാജ്യങ്ങളിലേക്കുള്ള പ്രവാസത്തിനുശേഷം ഏതാണ്ട് രണ്ടായിരത്തിനുശേഷം വലിയ തോതിലുള്ള ഒരു പ്രവാഹമാണ് യുകെയിലേക്കുണ്ടായിട്ടുള്ളത്. ഒരു പാശ്ചാത്യരാജ്യത്തെ നിയമ സംവിധാനങ്ങളെ കുറിച്ചുള്ള അറിവില്ലായ്മയും, പെട്ടെന്നുള്ള കാലാവസ്ഥാമാറ്റവും, വ്യത്യസ്തമായ ജോലി, ജീവിത സാഹചര്യങ്ങളും തുടങ്ങി പല പ്രതിസന്ധിയും കുടുംബങ്ങളില് പ്രശ്നങ്ങള് സൃഷ്ടിക്കുന്നു. ഇതിനു പല കാരണങ്ങളുണ്ടാകാം, പക്ഷേ ഇതൊക്കെ ആരോട് തുറന്നു പറയും? ആരു സഹായിക്കും?.
എല്ലാം ഉള്ളിലൊതുക്കി ജീവിതം മുന്നോട്ടു പോവുന്നതിനിടയില് കുടുംബങ്ങളുടെ താളം തെറ്റലിനു തന്നെ കാരണമാവുന്നു. ഇത്തരം സാഹചര്യങ്ങളില് പിടിച്ചു നില്ക്കാനാവാതെ കൊലപാതകങ്ങളിലേക്കും ആത്മഹത്യകളിലേക്കും പരിഹാരം തേടിപ്പോവുന്ന പല കുടുംബങ്ങളെയും നാം സമീപകാലത്തായി കണ്ടുകഴിഞ്ഞു. ഏതു സമയവും പൊട്ടി വമിക്കാവുന്ന അഗ്നി പര്വ്വതം പോലെ പുകഞ്ഞുകൊണ്ടിരിക്കുന്ന എത്രയോ കുടുംബങ്ങള് നമ്മുടെ ഇടയിലുണ്ടെന്നതും വളരെ യാഥാര്ഥ്യമാണ്...
കെറ്ററിംഗില് 35 വയസുകാരിയായ അഞ്ചു അശോകിനെയും അവരുടെ പിഞ്ചോമനകളായ ജീവന്, ജാന്വി എന്നിവരുടെയും ഞെട്ടിക്കുന്ന കൊലപാതക വാര്ത്ത 2022 ഡിസംബര് മാസം 18 ന് നാം മലയാളികള് വളരെ ഞെട്ടലോടെയാണ് കേട്ടത്. ഇതുപോലുള്ള വാര്ത്തകള് പലതും കേട്ടിട്ടുണ്ടെങ്കിലും മനുഷ്യ മനസ്സാക്ഷിയെ പിടിച്ചു കുലുക്കിയ ഈ സംഭവം മനഃസാക്ഷിയുള്ളവര്ക്കു സഹിക്കാവുന്നതിലും അപ്പുറമാണ്. തങ്ങള്ക്കെന്നും തുണയും, ആശ്രയവും, തണലുമാകേണ്ട ഒരു കുടുബനാഥനില് നിന്നും ഇത്തരം ഒരനുഭവം !!! ആര്ക്കും അവിശ്വസനീയമാണ്.
ഈ ഒരു വേദനയില് നിന്നും ഉടലെടുത്ത ആശയമാണ് ഈ ട്രസ്റ്റിന്റെ തുടക്കം. കുടുംബങ്ങളില് നടക്കുന്ന അതിരുവിട്ട സംസാരങ്ങള് വലിയ വാഗ്വാദങ്ങളിലേക്കും, ആര്ക്കും പരിഹരിക്കാന് പറ്റാത്ത കുടുംബ വഴക്കിലേക്കും ചെന്നെത്തുന്നു. ഈ ഡൊമസ്റ്റിക് വയലന്സ് തടയുന്നതിന് മലയാളി കുടുംബങ്ങളെ സഹായിക്കാനായി അഞ്ചുവിന്റെ വത്സല മക്കള് 'ജീവന് & ജാന്വി' എന്ന പിഞ്ചു കുഞ്ഞുങ്ങളുടെ ഓര്മ്മക്കായി ഞങ്ങള് 'ജീവന് ട്രസ്റ്റ് യുകെ' എന്ന ചാരിറ്റി പ്രസ്ഥാനത്തിന് രൂപം നല്കി.
യുകെയുടെ വിവിധ കോണുകളില് താമസിക്കുന്ന തികച്ചും പ്രൊഫഷണ ലുകളാണ് ഈ ഉദ്യമത്തില് നിങ്ങളോടൊപ്പം സൗജന്യ സഹായത്തിനായി ഉള്ളത്. അവയവദാനം കൊണ്ട് മലയാളികളുടെ ശ്രദ്ധ പിടിച്ചുപറ്റിയവരും, നഴ്സിംഗ് മേഖലയില് നിസ്വാര്ത്ഥ സേവനം ചെയ്തു കൊണ്ടിരിക്കുന്ന വരുമായ പലരും ഇതില് പങ്കാളികളാണെന്നത് തികച്ചും അഭിമാനത്തോടെ അറിയിക്കട്ടെ, മൂന്നു മാസത്തോളമായി പല മലയാളി കുടുംബങ്ങളെയും സഹായിക്കുവാനും അവരുടെ പ്രശ്നങ്ങളിലേക്ക് ഓടിച്ചെല്ലുവാനും ഞങ്ങള്ക്ക് കഴിഞ്ഞിട്ടുണ്ട് എന്നത് ഞങ്ങള്ക്ക് കൂടുതല് ഉത്തരവാദിത്വ ബോധം നല്കുന്നു.
വിദ്യാഭ്യാസപരമായി നാമൊക്കെ വളരെ ഉന്നതിയിലാണെകിലും ഇവിടെ നിന്നും ലഭ്യമാകുന്ന സൗകര്യങ്ങളെ കുറിച്ചുള്ള അറിവില്ലായ്മക്ക് ഒരു പരിഹാരമായി മലയാളി സമൂഹത്തെ സഹായിക്കാന് ഒരു പരിധിവരെ നമ്മുടെ ജീവന് ട്രസ്റ്റ് യുകെ ക്ക് കഴിയും എന്ന് ഞങ്ങള് ഉറച്ചു വിശ്വസിക്കുന്നു. അതിന് സന്നദ്ധരായി ജനറല് പ്രാക്റ്റീഷണേഴ്സ് (GP) ഡോക്ടേഴ്സ്, സോഷ്യല് വര്ക്കേഴ്സ്, നഴ്സിംഗ് പ്രൊഫഷണല്സ്, കൗണ്സിലേഴ്സ്, സോളിസിറ്റര്സ് കൂടാതെ വിവിധ രംഗങ്ങളില് പ്രശസ്തരായിട്ടുള്ള സാമൂഹിക പ്രവര്ത്തകര് മുതലായവരാണ് ഈ ജീവന് ട്രസ്റ്റില് നെടുംതൂണായിട്ടുള്ളത്.
ഇതിന്റെ ഔദ്യാഗിക ഉദ്ഘാടനവും വെബ്സൈറ്റ് പ്രകാശനവും ഏപ്രില് 22 ശനിയാഴ്ച വൈകുന്നേരം വൈകിട്ട് 6 മണിക്ക് കേംബ്രിഡ്ജില് വച്ച് കേംബ്രിഡ്ജ് മലയാളീ അസോസിയേഷന് (CMA) നടത്തുന്ന ഈസ്റ്റര് വിഷു ആഘോഷ പരിപാടിയില് വച്ച് റോയ്സ്റ്റണ് മേയര് കൗണ്സിലര് Cllr.മേരി ആന്റണി നിര്വഹിക്കുന്നതാണ്.
യുകെയുടെ അക്ഷര നഗരിയായ കേംബ്രിഡ്ജില് വച്ച് ഈ ചാരിറ്റി സംഘടന യുടെ ഉത്ഘാടനം നടത്തുവാന് സാധിക്കുക എന്നത് മലയാളികളെ സംബന്ധിച്ചിടത്തോളം വളരെ അഭിമാനകരമായ ഒന്നായി ഞങ്ങള് കാണുന്നു. ഓണം, ക്രിസ്തുമസ്, ഈസ്റ്റര്, വിഷു, ആഘോഷങ്ങള് മാത്രം നടത്താനുള്ള ഒരു സംഘടന മാത്രമായി തുടരുന്നതിനു പകരം തികച്ചു ഒരു സാമൂഹിക പ്രതിബദ്ധതയുള്ള ഒരു പ്രസ്ഥാനമാണ് കേംബ്രിഡ്ജ് മലയാളീ അസോസിയേഷന് എന്നത് ഒരിക്കല് കൂടി തെളിയിച്ചിരിക്കുകയാണ്.
ഇവിടെ തെളിയുന്ന ഈ ചെറിയ തിരി ഒരു വലിയ പ്രകാശ ഗോപുരമായി ഈ നാട്ടിലെങ്ങും പ്രശോഭിക്കുവാന് ജീവന് ട്രസ്റ്റിന് ഇടയാവട്ടെ എന്ന് പ്രത്യാശി ക്കുന്നു. ഉല്ഘാടന വേളയിലും തുടര്ന്നും നിങ്ങളുടെ സഹകരണം പ്രതീക്ഷിക്കുന്നു.... നിങ്ങളുടെ പ്രവാസജീവിതത്തിലെ പ്രതിസന്ധിയില് ഒരു തുണയായി ഞങ്ങളും നിങ്ങളുടെ കൂടെ ……
https://www.jeevantrust.co.uk/
